چھ مقامی جنگجوئوں کی ہلاکت ، ترال میں دوسرے روز بھی تعزیتی ہڑتال

کاروباری و تجارتی سرگرمیاں معطل ، جنگجوئوں کے آبائی علاقوں میں تعزیتی مجالس

سرینگر/23دسمبر: آرمپور ہ ترال میں مختصر جھڑپ کے دوران چھ مقامی جنگجوئوں کی یاد میں جنوبی قصبہ اونتی پورہ اور ترال میں مسلسل دوسرے روز بھی تعزیتی ہڑتال رہی۔ جس کے باعث معمو لات زندگی مفلوج ہو کر رہ گئے جبکہ امن و امان کی صورتحال کو بنائے رکھنے کیلئے سیکورٹی کی اضافی نفری بھی تعینات کی گئی تھی ۔ ادھر اونتی پورہ پولیس ڈویژن میں موبائیل انٹر نیٹ خدمات ہنوز بند پڑی ہوئی ہے ۔ سی این آئی کو نمائندے نے ترال سے اطلاع د ی ہے کہ سنیچروار کی صبح آرمپورہ ترال میں فوج و فورسز اور جنگجوئوں کے مابین مختصر جھڑپ میں چھ مقامی جنگجو ئوں جاں بحق ہو گئے ۔ چھ مقامی جنگجوئوں کی ہلاکت کے خلاف اتوار کو مسلسل دوسرے روز بھی ترال اور اونتی پورہ علاقوں میں تعزیتی ہڑتال رہی جس دوران دکانیں ،کاروباری ادارے اور تجارتی مراکز بند رہے جبکہ پبلک ٹرانسپورٹ سڑکوں سے غائب رہا۔ممکنہ احتجاجی مظاہروں کے پیش نظر پلوامہ ،ترال ،اونتی پورہ کے ساتھ ساتھ دیگر حساس علاقوں میں اضافی فورسز اہلکاروں کی تعیناتی عمل میں لائی گئی تھی۔ ان علاقوں میں واقع سرکاری دفاتر اور بینکوں میں معمول کا کام کاج جزوی طور پر متاثر رہاجبکہ بیشتر ٹیوشن سینٹر بند رہے۔ سرکاری ذرائع نے بتایا کہ کسی بھی علاقہ میں پابندیاں نافذ نہیں کی گئی ہیں، تاہم امن وامان کی صورتحال کو برقرار رکھنے کے لئے سیکورٹی فورسز کی اضافی نفری بدستور تعینات رکھی گئی ہے۔ معلوم ہوا ہے کہ مکمل ہڑتال کے بیچ جنوبی کشمیر کے مختلف علاقوںسے تعلق رکھنے والے سینکڑوں کی تعداد میں لوگوں نے مہلوک جنگجوئوں کے آبائی علاقوں میں پہنچ گئے جہاں انہوں نے لواحقین سے تعزیت کی اور جنگجوئوں کو خراج عقیدت پیش کیا ۔ اسی دوران معلوم ہوا ہے کہ پولیس ڈویژن اونتی پورہ میں موبائیل انٹر نیٹ خدمات ہنوز بند پڑی ہے ۔ بتایا جاتا ہے کہ جھڑپ کے ساتھ ہی افواہوں کی روکتھام کیلئے موبائیل انٹر نیٹ خدمات بند کی گئی جو دوسرے روز بھی بند رہی ۔