کٹھوعہ: 29 افراد کو فلش فلڈ سے ریسکیو کیا گیا:پولیس

کٹھوعہ : پولیس نے صوبہ جموں کے ضلع کٹھوعہ میں ‘فلش فلڈ ‘ میں پھنسے ہوئے 29 افراد کو بحفاظت باہر نکال کر محفوظ مقام پر منتقل کیا .

اس دوران سرینگر ،جموں شاہراہ پر ٹریفک کی آوا جاہی بھی بحال کردی گئی .یہ شاہراہ لینڈ سلائڈنگ کے نتیجے میں بند کی گئی تھی .

پولیس ترجمان نے اپنے ایک بیان میں بتایا کہ 10 بچوں ،6 خواتین سمیت 29 افراد کو فلش فلڈ سے بحفاظت باہر نکالا گیا .

پولیس ترجمان نے بتایا کہ گزشتہ رات موسلادھار بارشوں کے بعد یہاں فلش فلڈ آیا جسکے نتیجے میں درجنوں افراد گھروں میں محصور ہو کر رہ گئے ،جنہیں بچانے کےلئے ریسکیو آپریشن شروع کیا گیا .

انہوں نے کہا کہ نگری ،چھبی چاک اور جھک ہول اور بلاور کٹھوعہ میں ریسکیو آپریشن شروع کیا گیا ،جس میں پولیس ڈیزاسٹر منیجمنٹ کے اہلکاروں نے مشترکہ طور پر شرکت کی .
پولیس کے مطابق آپریشن کے 29 افراد کو ریسکیو کیا گیا جبکہ مویشیوں کو بھی محفوظ مقامات پر منتقل کیا گیا.

پولیس نے بتایا کہ موسلادھار بارشوں کے نتیجے میں کٹھوعہ کے کئی علاقوں میں سیلابی صورتحال پیدا ہونے کے بعد حساس علاقوں میں پولیس کی بھاری نفری کسی بھی ہنگامی صورتحال سے نمٹنے کےلئے تعینات کی گئی .

ڈوڈہ میں موسلادھار بارشوں کے بعد پیدا شدہ سیلانی صورتحال کے سبب تمام تعلیمی اداروں کو بند رکھنے کا فیصلہ لیا گیا .حکام کا کہنا ہے کہ یہ اقدامات احتیاط کے بطور اٹھائے گئے جبکہ یہاں کنٹرول رومز بھی قائم کئے گئے .صوبہ جموں میں گزشتہ دو روز سے موسلادھار بارشیں ہوئیں ،جسکے بعد کئی علاقوں میں سیلابی صورتحال پیدا ہوگئی.

حکام کا کہنا ہے کہ پولیس کو ہائی الرٹ پر رکھا گیا جبکہ کسی بھی ہنگامی صورتحال سے نمٹنے کےلئے حساس علاقوں میں بھاری نفری بھی تعینات کی گئی اور ہیلپ نمبرات بھی جاری کئے گئے .

ادھر موسم میں آئی بہتری کے ساتھ ہی سرینگر ،جموں شاہراہ پر ٹریفک کی آواجاہی بحال کردی گئی .

اس شاہراہ کو اتوار کے روز موسلادھار بارشوں کے بعد لینڈ سلائڈنگ کے باعث ٹریفک کی آواجاہی بند کی گئی.سرینگر اور جموں سے دونوں اطراف سے گاڑیوں کو آنے جانے کی اجازت دی گئی .

یاد رہے کہ سرینگر ،جموں شاہراہ پر رام بن سے ادھمپور تک کئی مقامات پر لینڈ سلائڈنگ ،چٹانیں اور پسیاں گرآئی تھیں.

حکام کے مطابق بارڈر اینڈ روڈس آرگنائزیشن نے شاہراہ پر سے رکاوٹیں ہٹائیں اور اسے قابل آمد ورفت بنایا .

مانسر ، مان وال ،فلاٹا،سنگور ،جھکنی اور ادھمپور کے مقام پر درماندہ گاڑیوں کو پیر کی صبح اپنی منزل مقصود کی جانب جانے کی اجازت دی گئی .

ڈوڈہ میں نہرو ندی اور دیگر ندی نالوں میں موسلادھار بارشوں کے بعد طغیانی آنے سے سیلابی صورتحال پیدا ہوگئی .انتظامیہ نے لوگوں سے اپیل کی ہے کہ وہ ندی نالوں کی جانب سے جانے سے گریز کریں .

نہروندی اور اسکی معاون ندی نالوں کے گرد ونواح میں رہائش پذیر لوگوں سے کہا گیا ہے کہ وہ عارضی پلوں کے استعمال اور ندی نالوں کو عبور کرنے سے گریز کریں.

ہفتہ کو محکمہ موسمیات نے درمیانہ سے لیکر بھاری بارشوں کی پیش گوئی تھی .