نئی دہلی،20اگست (یو این آئی) حکومت نے آج واضح کیا ہے کہ وزیر اعظم نریندر مودی نے پاکستان کے نئے وزیر اعظم عمران خان کو تحریر کردہ خط میں دونوں ملکویں کے درمیان اچھے پڑوسیوں کے رشتے قائم کرنے اور خطے کے لوگوں کی بھلائی کے لئے مثبت اور تعمیری رابطہ رکھنے کے تئیں عہد کا اظہار کیا تھا۔ذرائع نے پاکستان کے نئے وزیر خارجہ شاہ محمود قریشی کے مسٹر مودی کے خط کے سلسلے میں کئے گئے دعوے کو مسترد کرتے ہوئے کہا کہ یہ درست ہے کہ مسٹر مودی نے مسٹر خان کو اٹھارہ اگست کو خط لکھ کر مبارک باد دی تھی اور دونوں ملکوں کے درمیان ‘اچھے پڑوسی کے تعلقات قائم کرنے کے تئیں ہندوستان کے عہد ‘ کا اظہار کیا تھا۔ لیکن اس میں پاکستان کے ساتھ بات چیت شروع کرنے کے بارے میں کچھ نہیں کہا گیا تھا۔ذرائع نے کہاکہ خط میں مسٹر مودی نے اعتماد ظاہر کیا ہے کہ پاکستان میں نئی حکومت کے سہل انداز میں اقتدار سنبھالنے سے لوگوں کا جمہوریت پر اعتماد مضبوط ہوگا ۔ انہوں نے پاکستان کے عام انتخابات کے نتائج آنے کے بعد بھی مسٹر خان کے ساتھ ٹیلی پر ہوئی اپنی بات چیت کو یاد کرتے ہوئے برصغیر ہند و پاک میں امن ‘ سلامتی اور خوشحالی کے نقطہ نظر کو ایک دوسرے سے شریک کیا تاکہ خطے کو تشدد اور دہشت گردی سے آزاد کرکے ترقی پر توجہ مرکوز کی جاسکے ۔خیال رہے کہ پاکستانی میڈیا نے وہاں کے نئے وزیر خارجہ مسٹر قریشی کے حوالے سے دعوی کیا ہے کہ وزیر اعظم مسٹر مودی نے بات چیت کا آغاز کرنے کے لئے پاکستانی وزیر اعظم عمران خان کو خط لکھا ہے ۔ مسٹر قریشی نے اپنے پہلے خطاب میں کشمیر کا مسئلہ بھی اٹھایا اور کہا کہ دونوں ملکوں کے درمیان پیچیدہ معاملات ہیں ۔ جن پر بات چیت ہونی چاہئے ۔ ان کا کہنا ہے کہ ہمیں کسی دخل اندازی کے بغیر بات چیت کی ضرورت ہے ۔ ہمیں مسئلہ کا حل نکالنا ہوگا۔ دونوں ملکوں کے درمیان دوبارہ سے بات چیت شروع ہونی چاہئے ۔ایک میڈیا رپورٹ کے مطابق مسٹر قریشی نے یہ بھی کہا ” ہندوستان کے ساتھ مسلسل اور کسی دراندازی کے بغیر بات چیت کی ضرورت ہے ۔ ہم پڑوسی ہیں۔ طویل عرصے سے ہمارے درمیان تنازعات چلے آرہے ہیں ۔ ہم دونوں کو ہی اپنی پریشانیاں معلوم ہیں لیکن ہمارے پاس بات چیت کے سوا اور کوئی متبادل نہیں ہے ۔
Comments are closed.