اننت ناگ کے کئی علاقوں میں سڑکوں کی حالت انتہائی ناگفتہ بہہ

لوگوں کو شدید مشکلات کا سامنا ، اعلیٰ حکام سے معاملے میں مداخلت کی اپیل

سرینگر /13جولائی : اننت ناگ کے کئی علاقوں میں سڑکوں کی انتہائی خستہ حالت کے نتیجے میں لوگوں کو شدید ترین مشکلات کا سامنا کرنا پڑ رہا ہے ۔ اسی دوران مقامی لوگوں نے محکمہ آر ینڈ بی اور ضلع انتظامیہ پر الزام عائد کیا ہے کہ سڑک کی طرف اس ترقیاتی یافتہ دور میں بھی کوئی دھیان نہیں دیا گیا جس کے نتیجے میں لوگوں کو منٹوں کا سفر گھٹنوں میں طے کرنا پڑتا ہے جبکہ کئی اوقات بیماروں کو اسپتالوں تک پہنچنے کیلئے پیدل ہی سفر کرنا پڑتا ہے ۔سی این آئی نمائندے کے مطابق اننت ناگ کے کئی علاقوں جن میں خاص طور پر ہانجی دانتر ، میر دانتر اور اس کے ملحقہ علاقے قابل ذکر ہے میں سڑکوں کی حالت انتہائی ناگفتہ بہہ ہو گئی ہے ۔نمائندے کے مقامی لوگوں نے الزام عائد کیا ہے کہ سڑکوں کی حالت اس قدر خستہ ہو گئی ہے کہ اس سڑکوں سے پیدل سفر کرنا مشکل کی بات ہے جبکہ گاڑیوں میں سفر کرنا دور کی بات ہے ۔ انہوں نے بتایا کہ جہاں اس ترقی یافتہ دور میں ریاستی سرکار لوگوں کو تمام تر بنیادی سہولیات بہم رکھنے کے بڑے بڑے دعوئے کر رہی ہے تاہم اکسیویں صدی میں بھی ان علاقوں میں سڑکوں کی خستہ حالت ان تمام دعوؤں کی پول کھول رہی ہے ۔مقامی لوگوں کا کہنا ہے کہ اگرچہ انہوں نے اس معاملے کو لیکر کئی مرتبہ متعلقہ حکام اور ممبر اسمبلی کو بھی آگاہ کیا تھا تاہم انہوں نے بھی آج تک اس کی طرف کوئی توجہ نہیں دی جس کے نتیجے میں لوگ پریشانیوں میں مبتلا ہو چکے ہیں ۔ لوگوں کا کہنا تھا کہ الیکشن کے دوران ممبران اسمبلی نے لوگوں سے بڑے بڑے وعدے کرکے ان سے ووٹ حاصل کئے اور جب الیکشن میں انکو کامیابی حاصل ہو ئی تو انہوں نے لوگوں کو خدا کے رحم و کرم پر چھوڑ دیا ۔ انہوں نے ایک بار پھر مطالبہ کیا ہے کہ سڑکوں کی مرمت جلد عمل میں لائی جائے تاکہ لوگوں کے مشکلات کا ازالہ ہو سکے اور سڑکوں کو جلد از جلد قابل آمد رفت بنایا جائے۔