گاندربل میں چوری کا معاملہ حل، مسروقہ سونا بر آمد:پولیس

سری نگر، 14 مارچ

پولیس نے وسطی کشمیر کے ضلع گاندربل میں چوری کے ایک معاملے کو حل کرکے لاکھوں روپیے مالیت کا مسروقہ سونا بر آمد کیا ہے۔

ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس اسٹیشن لار کو 12 ستمبر 2024 کو عبدالرحمان شاہ ولد غلام محمد شاہ ساکن چک یانگورہ کی طرف سے ایک تحریری شکایت موصول ہوئی جس میں کہا گیا کہ 11 اور 12 ستمبر کی درمیانی شب کچھ نا معلوم چور اس کے گھر میں گھس گئے اور سونا اور نقدی رقم اڑا لے گئے۔

انہوں نے کہا کہ اس ضمن میں بی این ایس کے متعلقہ دفعات کے تحت ایک کیس درج کرکے تحقیقات شروع کی گئیں۔

ان کا کہنا ہے کہ تحقیقات کے دوران امتیاز احمد گورو ولد گلزار احمد ساکن اتھکھورو رابی تار حال پارمپورہ، ہلال احمد ڈار ولد غلام محمد ساکن گنڈ روشن رابی تار،عادل احمد صوفی ولد محمد افضل ساکن گنڈ روشن رابی تار، جاوید احمد میر ولد محمد شفیع ساکن گذ ہامہ گاندربل اور لطیف احمد ڈار ولد حبیب اللہ سالن وانگی پورہ سمبل نامی کچھ مشکوک افراد کو پولیس اسٹیشن لار پر پوچھ تاچھ کے لئے طلب کیا گیا۔
بیان میں کہا گیا کہ پوچھ تاچھ کے دوران ان ملزموں نے اعتراف کیا کہ انہوں نے اس جرم کا ارتکاب کیا ہے اور یہ بھی انکشاف کیا کہ وہ وادی کے مختلف پولیس تھانوں میں درج کئی چوری کے معاملوں میں بھی ملوث ہیں۔
پولیس ترجمان نے بتایا کہ ان کے انکشاف پر 5 لاکھ 50 ہزار 5 سو 88 روپیے مالیت کا سونا بر آمد کیا گیا جس میں سونے کے 3 پائونڈ،سونے کی 8 انگوٹھیاں، سونے کے 2 بالی جوڑے، 1 جوڑا جمکا اور 1 سونے کی چین شامل ہے۔
انہوں نے کہا کہ اس جرم کے ارتکاب کے لئے استعمال کی جانی والی ایک آلٹو گاڑی زیر رجسٹریشن نمبر JK01J – 7340 کو بھی ضبط کیا گیا۔