گاندربل حادثے میں نوجوان جاں بحق، دو دیگر زخمی

سری نگر،21جون

جموں وکشمیر کے وسطی ضلع گاندربل کے وتہ لار علاقے میں دیر شام پیش آئے سڑک حادثے میں 20سالہ نوجوان جاں بحق جبکہ دو دیگر زخمی ہوئے ہیں۔

اطلاعات کے مطابق جمعرات دیر شام وتہ لار گاندربل کے قریب ایک موٹر سائیکل آبپاشی نہر میں گر گئی جس کے نتیجے میں موٹر سائیکل سوار لاپتہ اور اس کے دو ساتھی زخمی ہوئے ۔

معلوم ہوا ہے کہ اطلاع ملتے ہی پولیس ، ایس ڈی آر ایف اور مقامی لوگ جائے موقع پر پہنچے اور بچاو کارروائی شروع کی ۔
مقامی ذرائع نے بتایا کہ جمعے کی صبح ایس ڈی آر ایف نے آبپاشی نہر سے نوجوان کی لاش برآمد کی ۔

متوفی کی شناخت 20سالہ عادل منظور شاہ ولد منظور احمد ساکن پٹن کے بطور ہوئی جبکہ زخمیوں کی پہچان مفصل ریشی ولد اسدللہ ریشی اور ناصر نبی بٹ ولد غلام نبی بٹ ساکنان نپالپورہ پٹن کے بطور ہوئی ہے۔
دریں اثنا پولیس نے معاملے کی نسبت کیس درج کرکے مزید تحقیقات شروع کی ہے۔