جموں،26فروری
جموں وکشمیر کے کٹھوعہ ضلع کے ہالٹی علاقے میں پولیس نے بینک ڈکیتی کے ایک منصوبے کو ناکام بنا کر دو نقب زنوں کو دھر دبوچا ۔
پولیس بیان کے مطابق 25اور 26فروری کی درمیانی شب دو سارق انکوش شرما ولد پرکاش چند ساکن درسو ادھم پور اور سنیل سنگھ ولد دھرم سنگھ ساکن ہالٹی کٹھوعہ نے جموں وکشمیر بینک برانچ کی دیوار پھلانگ کر اندر داخل ہوئے۔
انہوں نے کہاکہ نقب زن سٹرونگ روم کے اندر جانے کی سعی میں تھے کہ پولیس کی پیٹرولنگ پارٹی کوبینک کے اندر مشکوک سرگرمیوں کا شبہ ہوا چنانچہ پولیس ٹیم بھی اندر داخل ہوئی تاہم دونوں نقب زن رات کی تاریکی کا فائدہ اٹھا کر راہ فرار اختیار کرنے میں کامیاب ہوئے۔
پولیس بیان میں مزید کہا گیا ہے کہ سی سی ٹی وی فوٹیج کو کھنگالنے کے بعد نقب زنوں کی گرفتاری عمل میں لائی گئی۔
دریں اثنا پولیس نے اس ضمن میں مختلف دفعات کے تحت کیس درج کرکے مزید تحقیقات شروع کی ہے۔
Comments are closed.