کشمیر میں 3 سے 6 جنوری تک برف باری کے ایک اور مرحلے کا امکان

سری نگر، 28 دسمبر

وادی کشمیر میں بھاری برف باری کے بیچ محکمہ موسمیات نے 3 سے 6 جنوری تک برف باری کے ایک اور مرحلے کی پیش گوئی کی ہے۔
متعلقہ محکمے کے ایک ترجمان کے مطابق وادی 28 دسمبر کو مطلع ابر آلود رہنے کے ساتھ ہلکی برف باری ہوسکتی ہے جبکہ جموں کے میدانی علاقوں میں شام دیر گئے تک ہلکی بارشیں متوقع ہیں۔
انہوں نے کہا کہ وادی میں 29 دسمبر سے 31 دسمبر تک موسم مجموعی طور پر خشک رہنے کا امکان ہے۔
ان کا کہنا تھا کہ وادی میں یکم اور 2 جنوری کو پہاڑی علاقوں میں کہیں کہیں ہلکی برف باری ہوسکتی ہے۔
موصوف ترجمان نے بتایا کہ بعد ازاں وادی میں 3 سے 6 جنوری تک موسم مجموعی طور پر ابر آلود رہنے کے ساتھ میدانی علاقوں میں کہیں کہیں ہلکی سے درمیانی درجے کی برف باری امکان ہے۔
محکمہ موسمیات نے اپنی ایڈوائزری میں کہا کہ وادی میں 30 اور 31 دسمبر کو کہیں کہیں سردی کی لہر جاری رہ سکتی ہے۔
ایڈوائزری میں سیاحوں، مسافروں اور ٹرانسورٹرز کو مشورہ دیا گیا ہے کہ وہ اہم گذر گاہوں اور پہاڑی علاقوں پر درجہ حرارت نقطہ انجماد سے نیچے درج ہونے اور برفانی حالات کے یش نظر ٹریفک ایڈوائزری پر عمل کریں۔
دریں اثنا وادی میں بھاری برف باری کے بیچ شبانہ درجہ حرارت میں بہتری واقع ہوئی ہے۔
گرمائی دارلحکومت سری نگر میں کم سے کم درجہ حرارت منفی1.0 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی7.3 ڈگری سینٹی گریڈ ریکارڈ ہوا تھا۔
وادی کے شہرہ آفاق سیاحتی مقام گلمرگ میں کم سے کم درجہ حرارت منفی5.0 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی6.0 ڈگری سینٹی گریڈ ریکارڈ ہوا تھا۔
وادی کے دوسرے مشہور سیاحتی مقام پہلگام میں کم سے کم درجہ حرارت منفی2.8 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی8.0 ڈگری سینٹی گریڈ ریکارڈ ہوا تھا۔
سرحدی ضلع کپوارہ میں کم سے کم درجہ حرارت منفی1.2 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی6.4 ڈگری سینٹی گریڈ ریکارڈ ہوا تھا۔
گیٹ وے آف کشمیر کے نام سے مشہور قصبہ قاضی گنڈ میں کم سے کم درجہ حرارت منفی0.6 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی6.9 ڈگری سینٹی گریڈ ریکارڈ ہوا تھا۔
سری نگر میں گذشتہ 24 گھنٹوں کے دوران 8 انچ برف جمع ہوئی ہے جبکہ گلمرگ میں 1 فٹ 3 انچ اور پہلگام میں 1 فٹ 6 انچ برف جمو ہوئی تھی۔
جنوبی کشمیر کے ضلع اننت ناگ کے میدانی علاقوں میں 1 فٹ 5 انچ،قاضی گنڈ میں 2 فٹ 3 انچ، پلوامہ میں 10 سے 11 انچ، ضلع کولگام میں منزہ گام میں 1 فٹ 9 انچ، دیوسر میں 2 فٹ 3 انچ، ضلع شوپیاں میں 1 فٹ 5 انچ برف جمع ہوئی ہے۔
وسطی ضلع بڈگام کے میدانی علاقوں میں 7 انچ، چرار شریف میں 10 انچ جبکہ ضلع گاندربل کے میدانی علاقوں میں 7 انچ، زوجیال پر 1 فٹ 2 انچ، سونہ مرگ 8 انچ برف جمع ہوئی ہے۔
شمالی کشمیر کے ضلع بارہمولہ کے میدانی علاقوں میں 4 سے 5 انچ، سوپور میں 5 سے 6 انچ، اوڑی میں 6 انچ، ضلع کپوارہ کے میدانی علاقوں میں ڈیڑھ انچ برف جمع ہوئی ہے۔