کشمیر میں موسم خشک، 10 مئی تک موسم میں بڑی تبدیلی کا کوئی امکان نہیں

سری نگر، 3 مئی

وادی کشمیر میں خشک موسم کے بیچ شبانہ درجہ حرارت مسلسل معمول سے نیچے ریکارڈ ہو رہا ہے۔محکمہ موسمیات کی پیش گوئی کے مطابق وادی میں 10 مئی تک موسم میں بڑے پیمانے پر کسی تبدیلی کا کوئی امکان نہیں ہے۔

محکمے کے ایک ترجمان نے بتایا کہ وادی میں 4 مئی کی شام تک مطلع ابر آلود رہ سکتا ہے اور اس دوران کہیں کہیں ہلکی بارشوں کا امکان ہے۔انہوں نے کہا کہ وادی میں 5 مئی کو موسم عام طور پر خشک رہ سکتا ہے اور بعد دوپہر کہیں کہیں گرج چمک کے ساتھ بوندا باندی کا امکان ہے۔ان کا کہنا تھا کہ بعد میں 6 اور 7 مئی کو بھی موسم مجموعی طور پر ابر آلود رہ سکتا ہے اور اس دوران کہیں کہیں ہلکی بارشوں کا امکان ہے۔انہوں نے کہا کہ وادی میں 8 سے 10 تک موسم مجموعی طور پر خشک رہ سکتا ہے۔

محکمے نے کسانوں سے کہا ہے کہ وہ اس دوران کھیت کھلیانوں اور باغوں میں اپنے آپریشنز چلا سکتے ہیں۔ادھر وادی کا شبانہ درجہ مسلسل معمول سے کم درج ہو رہا ہے۔گرمائی دارلحکومت سری نگر میں کم سے کم درجہ حرارت 7.8 ڈگری سینٹی گریڈ ریکارڈ کیا گیا جو معمول سے1.9 ڈگری سینٹی گریڈ کم ریکارڈ ہوا تھا۔

وادی کے شہرہ آفاق سیاحتی مقام گلمرگ میں کم سے کم درجہ حرارت4.0 ڈگری سینٹی گریڈ ریکارڈ کیا گیا جو معمول سے0.3 ڈگری سینٹی گریڈ کم ریکارڈ ہوا تھا۔وادی کے دوسرے مشہور سیاحتی مقام پہلگام میں کم سے کم درجہ حرارت1.7 ڈگری سینٹی گریڈ ریکارڈ کیا گیا جو معمول سے 3.2 ڈگری سینٹی گریڈ کم ریکارڈ ہوا تھا۔سرحدی ضلع کپوارہ میں کم سے کم درجہ حرارت 4.8 ڈگری سینٹی گریڈ ریکارڈ کیا گیا جو معمول سے3.6 ڈگری سینٹی گریڈ کم ریکارڈ ہوا تھا۔گیٹ وے آف کشمیر کے نام سے مشہور قصبہ قاضی گنڈ میں کم سے کم درجہ حرارت6.2 ڈگری سینٹی گریڈ ریکارڈ کیا گیا جو معمول سے2.3 ڈگری سینٹی گریڈ ریکارڈ ہوا تھا۔