کشمیر میں رک رک کر بارشوں کا سلسلہ جاری، گلمرگ میں تازہ برف باری

سری نگر، 14 مارچ

محکمہ موسمیات کی پیش گوئی کے عین مطابق سری نگر سمیت وادی کشمیر کے میدانی علاقوں میں رک رک کر بارشیں ہو رہی ہیں جبکہ گذشتہ چوبیس گھنٹوں کے دوران سیاحتی مقام گلمرگ سمیت کچھ پہاڑی علاقوں میں ہلکی برف باری ہوئی ہے۔وادی کے شہرہ آفاق سیاحتی مقام گلمرگ میں گذشتہ چوبیس گھنٹوں کے دوران سب سے زیادہ 16.4 ملی میٹر بارش ریکارڈ ہوئی ہے جبکہ وہاں اس دوران 6 سینٹی میٹر برف بھی ریکارڈ ہوئی ہے۔

وادی کشمیر میں گذشتہ پانچ روز سے رک رک کر بارشوں کا سلسلہ جاری ہے اور محکمہ موسمیات کے مطابق وادی میں اگلے 48 گھنٹوں کے دوران بھی برف و باراں کی پیش گوئی کی ہے۔متعلقہ محکمے کے ایک ترجمان نے بتایا کہ وادی میں 14 اور 15 مارچ کو کئی مقامات پر ہلکی سے درمیانی درجے کی برف باری یا بارشوں کا امکان ہے۔انہوں نے کہا کہ 16 مارچ کی صبح کو بھی وادی میں کئی مقامات پر رک رک برف وباراں متوقع ہے اور دوپہر کے بعد موسمٍ میں بہتری کا امکان ہے۔ان کا کہنا ہے کہ بعد ازاں 17 سے 24 مارچ موسم عام طور پر خشک رہنے کا امکان ہے تاہم اس دوارن 19 مارچ موسم ابر آلود رہ سکتا ہے۔محکمے نے اپنی ایڈوائزری میں مسافروں، سیاحوں اور ٹرانسپورٹروں سے کہا ہے کہ وہ ٹریفک ایڈوائزری پر عمل کریں جبکہ کسانوں سے کہا گیا ہے کہ وہ 16 مارچ تک اپنے کھیت کھلیانوں اور باغوں میں آپریشنز معطل رکھنے کی صلاح دی ہے۔علاوہ ازیں لوگوں سے ان علاقوں جہاں برفانی تودے گر آنے کے خطرات رہتے ہیں، میں جانے سے احتراز کرنے کی اپیل کی ہے۔
دریں اثنا وادی کے بیشتر مقامات پر شبانہ درجہ حرارت 1 سے 3 ڈگری سینٹی گریڈ معمول سے زیادہ ریکارڈ ہوا ہے۔گرمائی دارالحکومت سری نگر میں کم سے کم درجہ حرارت 6.0 ڈگری سینٹی گریڈ ریکارڈ کیا گیا جو معمول سے2.3 ڈگری سینٹی گریڈ زیادہ ریکارڈ ہوا تھا۔سیاحتی مقام گلمرگ میں کم سے کم درجہ حرارت منفی2.8 ڈگری سینٹی گریڈ ریکارڈ کیا گیا جو معمول سے 0.5 ڈگری سینٹی گریڈ زیادہ ریکارڈ ہوا تھا۔وادی کے دوسرے مشہور سیاحتی مقام پہلگام میں شبانہ درجہ حرارت2.2 ڈگری سینٹی گریڈ ریکارڈ کیا گیا جبکہ کوکرناگ میں کم سے کم درجہ حرارت 4.5 ڈگری سینٹی گریڈ ریکارڈ ہوا ہے۔