پولیس سربراہ اور کور کمانڈر نے سیکورٹی صورتحال کا جائزہ لیا، سرگر م ملی ٹینٹوں کے خلاف مشترکہ آپریشن شروع کرنے کا فیصلہ

سرینگر، 25جولائی

پولیس کے سربراہ دلباغ سنگھ اور کور کمانڈر لیفٹیننٹ جنرل راجیو گھائی نے پولیس ہیڈ کواٹر سری نگر میں سیکورٹی صورتحال کا جائزہ لیا۔معلوم ہوا ہے کہ میٹنگ کے دوران سرگرم جنگجووں کے خلاف مشترکہ طور پر آپریشن شروع کرنے کا فیصلہ لیا گیا۔

ذرائع نے بتایا کہ منگل کے روز پولیس ہیڈ کواٹر سری نگر میں پولیس سربراہ دلباغ سنگھ اور کور کمانڈر لیفٹیننٹ جنرل راجیو گھائی کی سربراہی میں ایک اعلیٰ سطحی میٹنگ منعقد ہوئی جس میں اے ڈی جی پی ہیڈکواٹر ایم کے سنہا کے علاوہ دیگر سینئر آفیسران نے شرکت کی۔میٹنگ کے دوران کشمیر میں سیکورٹی گرڈ کو مزید مضبوط کرنے اور ملی ٹینٹوں کے عزائم کو ناکام بنانے کی خاطر حفاظتی اقدامات کو مضبوط کرنے کا فیصلہ لیا گیا۔
ذرائع نے بتایا کہ میٹنگ کے دوران پاکستان کے ساتھ لگنے والی سرحدوں پر دراندازی ، منشیات اور ہتھیاروں کو اس طرف بھیجنے پر تشویش کا اظہار کیا گیا۔ میٹنگ کے دوران پولیس سربراہ دلباغ سنگھ نے کہاکہ سیکورٹی ایجنسیوں کے درمیان قریبی تال میل کی وجہ سے ملی ٹینٹوں کے منصوبوں کو ناکام بنانے میں مدد ملی ہے۔

انہوں نے فوج اور پولیس کے درمیان مستقل بنیادوں پر انٹیلی جنس شیئرنگ کی اہمیت پر زور دیتے ہوئے کہاکہ مختلف سیکورٹی اداروں کے درمیان قریبی تال میل ناگزیر ہے۔ذرائع نے بتایا کہ پولیس اور فوج کے سینئر آفیسران نے سرگرم ملی ٹینٹوں کے خلاف بڑے پیمانے پر مشترکہ آپریشن شروع کرنے کا بھی فیصلہ لیا ہے۔یو این آئی