شدید دھند کے نتیجے میں معمول کی زندگی کئی گھنٹوں تک متاثر ، موسم خشک رہنے کی پیشگوئی
سرینگر /05دسمبر: بادشاہ چلہ کلان کی آمد کے بیچ سردی کی لہر نے وادی کو اپنی لپیٹ میں لے لیا جبکہ سرینگر میں مسلسل درجہ حرارت نقطہ انجماد سے نیچے گر کرکئی ڈگری منفی میں ریکارڈ کیا گیا۔ اس دوران وادی میں منگل اور بدھ کی درمیانی رات رواں موسم کی سرد ترین رات کو بھی ریکارڈ کیا گیا۔ اس دوران سرینگر میں اعلیٰ صبح شدید دھند چھائی رہی جس کے نتیجے میں معمول کی زندگی کئی گھنٹوں تک متاثر رہی۔کرنٹ نیوز آف انڈیا کے مطابق شدید سردی کی لہر نے وادی کو اپنی لپیٹ میں لے لیا ہے اور اس دوران صبح و شام یخ بستہ ہواؤں کی وجہ سے عام زندگی معطل ہو کر رہ گئی ہے۔اگرچہ رات بھر آسمان کھلا رہتا ہے تاہم اس دوران کھلے آسمان کی وجہ سے سردی میں بے پناہ اضافہ ہو رہا ہے جبکہ رات کے وقت ہڑیوں کو گلا دینے والی اس سردی کی وجہ سے بیشتر لوگ گھروں سے باہر نہیں آتے۔دن بھر اگر چہ کبھی کبھی فضاء میں سورج بھی جلوا ہ افروز ہوتا تاہم اس دوران بھی سرد ہواؤں کی لہر سورج کی تمازت کو کھا جاتی ہے۔شہر سرینگر سمیت وادی کے جنوب و شمال میں سردیو ں کی وجہ سے صبح دیر سے دن شروع ہوتا ہے اور شام کو جلد ہی رات ہونے کی وجہ سے اوقات کار میں بھی کمی آئی ہے۔ موسم سرماکی آمد کے ساتھ ہی وادی میں عام زندگی اگر چہ متاثر ہوتی ہے تاہم سخت ترین سردیوں اور یخ بستہ ہواؤں کی وجہ سے اس میں اضافہ ہوتا ہے۔ دریں اثناء سرینگر سمیت وادی کے بیشتر علاقوں میں درجہ حرارت بھی نقطہ انجماد سے مسلسل نیچے گر گیا اور اتوراور سوموار کی شب رواں موسم کی سب سے سرد ترین رات کے طور پر ریکارڈ کی گئی۔ سرینگر میں بھی درجہ حرارت کے گرنے کی وجہ سے موسم کی انتہائی سرد رات کو ریکارڈ کیا گیا جبکہ مجموعی طور پر منفی 3اعشاریہ 2 ڈگری کادرجہ حرارت ریکارڈ کیا گیا۔ ادھر معلوم ہوا ہے کہ وادی کے دیگر علاقوں میں بھی سرد لہر جاری ہے۔خطہ لداخ کا لیہہ بدستور ریاست کی سرد ترین جگہ بنی ہوئی ہے، جہاں کم سے کم درجہ حرارت منفی 8 اعشاریہ ایک ڈگری ریکارڈ کیا گیا۔ قصبہ کرگل میں کم سے کم درجہ حرارت منفی 7 اعشاریہ 2 ڈگری ریکارڈ کیا گیا۔ تاہم سری نگر سمیت وادی کے تمام علاقوں میں دوپہر ایک بجے سے اچھی خاصی دھوپ کھلی رہی۔ شمالی کشمیر میں واقع شہرہ آفاق سیاحتی مقام گلمرگ میں گذشتہ رات کم سے کم درجہ حرارت منفی 5 اعشاریہ 5 ڈگری ریکارڈ کیا گیا۔اس دوران سری نگر میں بدھ کی صبح شدید دھند چھائی رہی جس کے نتیجے میں معمول کی زندگی کئی گھنٹوں تک متاثر رہی۔ شدید دھند کی وجہ سے گاڑیوں کی آمدورفت کئی گھنٹوں تک متاثر رہی اور بیشتر گاڑیاں کچھوے کی رفتار سے چلتی ہوئی نظر آئیں۔ سری نگر کی اکثر سڑکوں پر گاڑیاں ہیڈلائٹ جلا کر سفر طے کرتی ہوئی نظر آئیں۔تاہم سری نگر کے مقابلے میں اس کے مضافاتی علاقوں اور اضلاع کی صورتحال بالکل مختلف نظر آئی۔محکمہ موسمیات کے ایک ترجمان نے بتایا کہ ریاست میں اگلے چوبیس گھنٹوں کے دوران موسم مجموعی طور پر خشک رہے گا، جس کے نتیجے میں کم سے کم درجہ حرارت میں مزید گراؤٹ درج کی جاسکتی ہے۔
Comments are closed.