نوجوانوں کو ہی جموں وکشمیر کا پرچم بلند رکھنا ہوگا،جمہوری اور آئینی حقوق کی رکھوالی کا راز اتحاد میں ہی مضمر/فاروق عبداللہ

سرینگر: جموں وکشمیر کا پرچم ہماری ریاست کی انفرادیت کی علامت قرار دیتے ہوئے صدرِ نیشنل کانفرنس ڈاکٹر فاروق عبداللہ نے کہا ہے کہ ہماری جماعت اس کی حرمت بنائے رکھنے میں اپنا کردار ادا کرتی رہے گی۔ سی این آئی کے مطابق ان باتوں کا اظہار صدرِ انہوں نے ضلع سرینگر کے خواتین ونگ کے اجلاس اور حلقہ انتخاب امیرا کدل کے یوتھ نیشنل کانفرنس کے کارکنوں سے خطاب کرتے ہوئے کیا۔ انہوں نے کہا کہ متحد اور یک زبان ہوکر ہی اپنے مفادات ، احساسات اور جمہوری و آئینی حقوق کی رکھوالی کرسکتے ہیں، ٹولیوں میں تقسیم ہونے سے ہمارا دشمن آسانی سے اپنے ناکام عزائم میں کامیاب ہوسکتا ہے۔ انہوں نے کہاکہ اس وقت ریاست کے عوام اور سیاسی جماعتوں کو تمام اختلافات بالائے طاق رکھ کر جموںوکشمیر کی وحدت، انفرادیت، اجتماعیت اور مذہبی ہم آہنگی کیخلاف ہورہی سازشوں کو ناکام بنانا چاہئے۔خواتین عہدیداروں سے خطاب کرتے ہوئے ڈاکٹر فاروق عبداللہ نے کہا کہ آج کے دور میں خواتین کسی بھی صورت میں مردوں سے کم نہیں۔ خواتین نے ہرایک شعبے میں اپنی قابلیت اور صلاحیت کا لوہا منوایا ہے۔ملک بنانے میں خواتین کا رول کسی بھی زاوئے سے کم نہیں۔ انہوں نے کہا کہ ریاست خصوصاً کشمیری خواتین نے سخت ترین اور مشکل ادوار میں ثابت قدم رہ کر اپنے عزم اور استقلال کا ثبوت فراہم کیا۔ ڈاکٹر فاروق عبداللہ نے کہا کہ نیشنل کانفرنس نے خواتین کی بااختیاری کیلئے ناقابل فراموش کام کیا۔ ہماری جماعت نے ہی خواتین کیلئے پنچایتوں میں 33فیصدی ریزرویشن دی اور میڈیکل کالجوں میں 50فیصدی نشستیں مختص رکھیں۔سی این آئی کے مطابق انہوں نے کہا کہ ہماری جماعت خواتین کی عملی سیاست میں شرکت کی حامی رہی ہے اور ہمیں اس بات پر فخر ہے کہ ہماری جماعت میں تعلیم یافتہ، قابل، باصلاحیت اور جفا کش خواتین شامل ہیں۔ انہوں نے کہا کہ نیشنل کانفرنس حکومت میں آکر خواتین کی بااختیاری کیلئے مزید کام کریگی اور نئی پالیسیاں متعارف کرے گی۔اس موقعے پر خواتین ونگ کی ریاستی صدر شمیمہ فردوس اور صوبائی صدر انجینئر صبیہ قادری نے بھی خطاب کیا جبکہ اس موقعے پر سینئر پارٹی لیڈران پیر آفاق احمد، عرفان احمد شاہ،شوکت احمد میر ،عمران نبی ڈار ،غلام نبی بٹ اور یوتھ ضلع صدر سرینگر خالد راٹھور بھی موجود تھے۔یوتھ نیشنل کانفرنس کے کارکنوں سے خطاب کرتے ہوئے ڈاکٹر فاروق عبداللہ نے کہا کہ نوجوانوں کو ہی ریاست کو تعمیر و ترقی اور نئی منزلوں کی اور لے جانا ہے اور ساتھ ہی جموں و کشمیر کے پرچم کو ہمیشہ بلند رکھنا ہے۔ انہوں نے کہا کہ ریاست کی انفرادیت اور شناخت کے پیچھے ایک سنہری تاریخ ہے اور شیر کشمیر شیخ محمد عبداللہ کے تاریخ ساز اقدامات ہماری اس انفرادیت سے جھلکتے ہیں۔لیکن شیر کشمیر نے ریاست کی انفرادیت لے حصول اور تحفظ کیلئے بے بہا قربانیاں پیش کیں ہیں۔ انہوں نے کہا کہ دفعہ370اور 35اے میں ہماری ریاست کی انفرادیت کو تحفظ حاصل ہوا ہے اور اب یہ نوجوانوں کی ذمہ داری بنتی ہے کہ وہ شانہ بہ شانہ چل کر ریاست کی اس انفرادیت کی رکھوالی میں اپنا رول نبھائیں۔نوجوانوں کو ہی ریاست کی اجتماعیت، مذہبی ہم آہنگی اور آپسی بھائی چارے کی ریت کو قائم و دائم رکھنا ہوگا کیونکہ آگے چل کو آپ کو ہی ریاست اور پارٹی کی باگ ڈور سنبھالنی ہے۔