مقامی نوجوان سے شادی کے بعد غیر قانونی طور پر رہائش پذیر بنگلہ دیشی خاتون جموں میں گرفتار

جموں / 09اگست / ٹی آئی نیوز

مقامی نوجوان سے شادی کرنے کے بعد جموں میں غیر قانونی طو رپر رہائش پذیر بنگلہ دیشی خاتون کو پولیس نے گرفتار کر لیا ۔

تفصیلات کے مطابق جموں شہر کے تالاب تلو میں پولیس نے مقامی نوجوان سے شادی کرنے کے بعد غیر قانونی طور پر مقیم بنگلہ دیشی خاتون کو گرفتار کیا ہے۔

پولیس ذرائع نے بتایا کہ بنگلہ دیشی خاتون جس کی شناخت جونکی چیرام کے نام سے ہوئی ہے، جو 2022 میں تین ماہ کے ویزے پر جموں آئی تھی، کو جمعرات کو حراست میں لے لیا گیا۔

ذرائع نے بتایا کہ خاتون نے تریکوٹہ نگر علاقہ کے ایک مقامی نوجوان سے شادی کی تھی اور یہ جوڑا اس وقت تالاب تلو کے پورن نگر علاقہ میں رہ رہا تھا۔

پولیس ذرائع نے بتایا کہ تین ماہ کے ویزے کی میعاد مئی 2022 میں ختم ہو گئی تھی، لیکن خاتون واپس نہیں گئی، اور اپنے غیر قانونی قیام کے دوران اس نے ایک مقامی نوجوان سے شادی کی ہے ۔