مساجد کی جا نب سے رمضان کے مہینے میں غیر مسلم بھائیوں کے لیےبھی کیا جارہا ہے کھانے کا انتظام

ممبئی : 6 مئی : مشن ‘کوئی بھوکا نہ سوئے’ کے تحت خدمت خلق، مزدوروں میں کھانے کی تقسیم اور غریب مجبور خاندانوں میں راشن پہنچانے کا جو سلسلہ شروع کیاگیا تھا وہ آج بھی جاری ہے اور اس کے تحت مسجد رمضان کے مہینے میں بھی غیر مسلم بھائیوں کے لیے ویج کھانے کا انتظام کر رہی ہے۔
ملک میں کرونا وائرس کے پھیلاو کو روکنے کے لیے جب سے لاک ڈاؤن شروع کیا گیا اس کے دو تین دن بعد سے ہی غریبوں، مزدوروں، بیواؤں اور پریشان حال لوگوں کو مدد پہنچانے کا سلسلہ جامع مسجد اہل حدیث خیرانی روڈ ساکی ناکہ کی جانب سے جاری ہے۔
ملک میں لاک ڈاؤن کی وجہ سے روزانہ مزدوری کرکے کھانے والاطبقہ کافی تنگی اور پریشانی کا شکار ہوگیا جس کو محسوس کرتے ہوئے جامع مسجد اہل حدیث خیرانی روڈ ساکی ناکہ کے امام وخطیب مولانا عاطف سنابلی نے مشن کوئی بھوکا نہ سوئے کی شروعات کی جس کے تحت بلا تفریق مذہب ومسلک محض انسانیت کی بنیاد پر روزانہ تقریبا ایک ہزار لوگوں کو کھانا مہیا کرانے کے ساتھ مجبور اور پریشان حال مسلم وغیر مسلم خانداںوں کے لئے ضروری اشیائے خوردونوش پر مشتمل تقریبا چارسو راشن کے پیکٹ تقسیم کئے گئے۔
مولانا عاطف سنابلی نے بتایا کہ ، اسی طرح رمضان میں کھجور، دال، چنا، چاول، آٹا، شکر، چائے پتی اور مسالہ، سوئیں وغیرہ جیسی تقریبا پچیس گھریلو و ماہ رمضان میں لگنے والی دیگر اشیائے ضرورت کے ساتھ ، اور عام راشن کے علاوہ چارسو سے زائد قیمت کے ایک رمضانی کٹ ( رمضانی تحفہ کے نام سے) شہر کے مختلف علاقوں میں انکے رضاکاراروں نے گھر گھر علاقہ میں بلکہ پورے شہر میں پہنچایا۔
اسی طرح رمضان میں پریشان حال مسلمان رزوے دار بھائیوں کے لئے سحری وبہترین افطاری کا انتظام کیا جارہا ہے، سماجی دوری کے ساتھ ماسک وغیرہ کی پابندی کے ساتھ روزے داروں کو افطار پہنچا دیا جاتا ہے۔ ان تمام کاموں کے علاوہ رمضان کے مقدس ومحترم مہینہ میں غیر مسلم برادران وطن کے لئے بھی کھانے کا انتظام کیا جارہا ہے اور چار سو سے پانچ سو تک غیرمسلم پریشان حال بھائیوں کے لئے بھی اس رمضان میں کھانا مہیا کیا جارہا ہے۔
مولانا عاطف سنابلی نے کہا کہ اس عظیم مشن کی کامیابی پر میں سب سے پہلے اللہ کاشکر گذار ہوں اس کے بعد اپنے محسنین و معاونین اور نوجوانوں اور ذمہ داران کا جن کا مکمل سپورٹ اور تعاون حاصل ہے ۔ انھوں نے کہ اکہ خدمت خلق اور اللہ کے بندوں، بھوکوں کا سہارا بننا ان کی بھوک مٹانے کے لئے کھانے اور سحری کا انتظام کرنا یہ ہمارے باعث سعادت وشرف ہے جسے ہم ایک مشن سمجھ کر انجام دے رہے ہیں.