لوک سبھا انتخابات :ڈی آئی جی ادھم پورہ ریاسی رینج کی سربراہی میں میٹنگ ،سیکورٹی پلان کا جائزہ لیا

سرینگر /30مارچ /

جموں کے ادھم پورہ لوک سبھا حلقہ کیلئے پُر امن انتخابات کیلئے ڈی آئی جی ادھم پورہ ریاسی رینج کی سربراہی میں ایک اعلیٰ سطحی میٹنگ منعقد ہوئی جس دوران انہوں نے سیکورٹی پلان کا جائزہ لیا ۔ خیال رہے کہ جموں کشمیر میں لوک سبھا انتخابات کے پہلے مرحلے میں 19اپریل کو ادھم پورہ حلقہ میں ووٹنگ ہونی ہے ۔

سی این آئی کے مطابق جموں و کشمیر پولیس نے ادھم پور لوک سبھا حلقہ کیلئے اپنے سیکورٹی پلان کا جائزہ لیا جو 19 اپریل کو پہلے مرحلے میں انتخابات ہونے جا رہی ہے۔پولیس کے ایک ترجمان نے بتایا کہ ڈپٹی انسپکٹر جنرل آف پولیس ادھم پورریاسی رینج رئیس محمد بٹ نے ادھم پور ضلع ہیڈکوارٹر میں سینئر افسران کے ساتھ میٹنگ میں پارلیمانی انتخابات کی تیاریوں کا جائزہ لیا۔انہوں نے کہا کہ تمام متعلقہ اور ہم آہنگ پہلوو¿ں پر تفصیل سے تبادلہ خیال کیا گیا، جس میں پولنگ بوتھ کے سیکورٹی پلان (مقام کی حساسیت کے مطابق)، اسٹرانگ روم کی سیکورٹی، الیکٹرانک ووٹنگ مشینوں (ای وی ایم) کے جمع کرنے اور تقسیم کرنے کے مرکز، ٹرانسپورٹ اور روٹ پلان شامل ہیں۔

ترجمان نے کہا کہ میٹنگ کے دوران مواصلاتی پلان، امن و امان، کسی بھی ہنگامی صورتحال میں ایس او پیز اوور گراو¿نڈ ورکرس کی سرگرمیوں پر نگرانی، ہتھیار ڈالنے اور رہائی پانے والے ملی ٹنٹوں اور امن و امان کو خلل ڈالنے والے افراد کے بارے میں تفصیلی تبادلہ خیال کیا گیا۔

انہوں نے کہا کہ میٹنگ میں سوشل میڈیا پر نظر رکھنے کیلئے اس کے غلط استعمال سے بچنے، پولنگ پارٹیوں کی نقل و حرکت کی نگرانی، سی اے پی ایف کی رہائش اور جلسہ گاہوں کیلئے سیکورٹی پلان اور جلوس اور ریلیوں کے انتظامات کی حکمت عملی بھی تیار کی گئی۔ انہوں نے کہا کہ پولیس کنٹرول رومز کو مضبوط بنا کر ملک دشمن عناصر کی تخریبی سرگرمیوں پر نظر رکھنے اور مناسب رپورٹنگ چینلز پر بھی زور دیا گیا۔