سڑک حادثات پر قابو اور سیکورٹی بڑھانے کیلئے سرینگر جموں شاہراہ پر مزید سی سی ٹی وی کیمرے نصب ہونگے / صوبائی کمشنر کشمیر

سرینگر /22نومبر /

سڑک حادثات پر قابو پانے اور سیکورٹی کو بڑھانے کیلئے سرینگر جموں شاہراہ پر مزید سی سی ٹی وی کیمرے نصب کیے جائیں گے کا اعلان کرتے ہوئے صوبائی کمشنر کشمیر وی کے بدھوری نے کہا کہ حادثات کے روکتھام کیلئے مزید جامع نقطہ نظر کی ضرورت ہے ۔ انہوں نے مسافروں کو یقین دلایا کہ درست دستاویزات اور لائسنس رکھنے والوں کو کسی قسم کی پریشانی کا سامنا نہیں کرنا پڑے گا ۔

ایس کے آئی سی سی میںایک تقریب کے حاشیہ پر میڈیا نمائندوں سے بات کرتے ہوئے صوبائی کمشنر کشمیر وی کے بدھوری نے سڑک حادثات سے نمٹنے کیلئے مزید جامع نقطہ نظر کی ضرورت پر بھی زور دیا۔ انہوں نے کہا”ہمیں امن و امان سے بالاتر ہو کر سوچنے کی ضرورت ہے؛ یہ ایک جذباتی اور حساس مسئلہ ہے۔ ہمیں ایسے سانحات کو روکنے کیلئے اخلاقی تعلیم دینا چاہیے“۔صوبائی کمشنر نے مسافروں کو یقین دلایا کہ انہیں غیر ضروری ہراسانی کا سامنا نہیں کرنا پڑے گا۔

انہوں نے کہا ”درست دستاویزات اور لائسنس رکھنے والوں کو کسی قسم کی پریشانی کا سامنا نہیں کرنا پڑے گا۔ قانون سب پر یکساں لاگو ہوتا ہے“۔ڈویڑنل کمشنر کشمیر نے مزید کہا کہ سڑک حادثات پر قابو پانے اور سیکورٹی کو بڑھانے کیلئے کشمیر ہائی وے پر مزید سی سی ٹی وی کیمرے نصب کیے جائیں گے۔ انہوں نے کہا کہ حالیہ ٹینگ پورہ بائی پاس حادثے نے انتظامیہ کو سڑک کی حفاظت کیلئے زیادہ فعال انداز اپنانے پر آمادہ کیا۔

انہوں نے کہا ” یہ کیمرے نہ صرف سڑک کی حفاظت کیلئے بلکہ سیکورٹی کے نقطہ نظر سے بھی اہم ہیں۔ “ انہوں نے کہا کہ انتظامیہ اس بات کو یقینی بنائے گی کہ غیر فعال کیمروں کی مرمت اور نگرانی باقاعدگی سے کی جائے۔