جموں/23 نومبر
جموں وکشمیر پولیس کے سپیشل آپریشنز گروپ (ایس او جی) نے بدھ کو ضلع سانبہ میں بین الاقوامی سرحد پر کئی علاقوں میں تلاشی آپریشن چلایا۔سرکاری ذرائع نے بتایا کہ جموں و کشمیر پولیس کے ایس او جی نے سی آر پی ایف کی ایک ٹیم کے ہمراہ بدھ کو سانبہ میں بین لاقوامی سرحد پر کئی علاقوں میں تین گھنٹوں پر محیط تلاشی آپریشن چلایا۔انہوں نے کہا کہ یہ آپریشن در اندازی کی حالیہ کوششوں کے پیش نظر چلایا گیا۔پولیس ذرائع نے بتایا کہ یہ آپریشن بدھ کی صبح ایس ایم پورہ سے شروع کیا گیا اور رام گڑھ سیکٹر کے سپوال، چملیال اور نارائن پور علاقوں پر اختتام ہوا۔انہوں نے کہا کہ دوران آپریشن کسی ممکنہ زیر زمین ٹنل کو تلاش کرنے اور مشتبہ ڈرون مواد کھوجنے پر خاص توجہ دی گئی۔ان کا کہنا تھا کہ تاہم اس آپریشن کے دوران کوئی مشتبہ شئی نہیں پائی گئی۔قابل ذکر ہے کہ ایک فوجی ترجمان کے مطابق بی ایس ایف نے منگل کی صبح جموں کے ارینہ سیکٹر میں بین الاقوامی سرحد پر ایک در انداز کو ہلاک کیا جبکہ سانبہ کے رام گڑھ سیکٹر میں ایک پاکستانی باشندے کو گرفتار کیا گیا جس کو بعد میں بی ایس ایف اور پاکستانی رینجرس کے درمیان فلیگ میٹنگ کے بعد وطن واپس بھیج دیا گیا۔دریں اثنا ذرائع نے بتایا کہ جموں میں بین الاقوامی کنٹرول لائن پر فوج کو مستعد رہنے کے احکامات صادر کئے گئے ہیں۔ ذرائع نے بتایا کہ پچھلے کئی روز سے بین الاقوامی کنٹرول لائن پر مشتبہ افراد کی نقل حرکت کے بعد سرحدی علاقوں میں چوکسی بڑھائی گئی ہے۔ ذرائع نے بتایا کہ امکانی دراندازی کے واقعات کو ناکام بنانے کی خاطر فوج کسی بھی چیلنج کا مقابلہ کرنے کے لئے تیار ہیں۔
Comments are closed.