دفعہ 370کیخلاف نئی عرضی دائر :عدالت عظمیٰ نے سماعت کرنے سے صاف انکار کیا

سرینگر/26نومبر: سپریم کورٹ نے سوموار کو ریاست کو خصوصی پوزیشن دینے والے آئین دفعہ370کیخلاف ایک نئی عرضی پر سماعت سے صاف انکار کرتے ہوئے اسے خارج کر دیا ۔ خیال رہے کہ 14نومبر کو ایپکس کورٹ نے مرکزی و ریاستی سرکار کی استدعا پر یہ اعلان کیا تھا کہ دفعہ370کی عرضی کی سماعت ماہ اپریل 2018میں ہوگی ۔ سی این آئی کے مطابق ریاست جموں کشمیر کی خصوصی پوزیشن دفعہ 370کو لیکر جاری تنازعہ کے بیچ عدالت عظمیٰ نے دفعہ 370کے خلاف دائر کی گئی تازہ عرضی کو سننے سے انکار کیا ہے ۔ بتایا جاتا ہے کہ عدالت عظمیٰ نے تازہ پٹیشن رد کرتے ہوئے کہا کہ پٹیشن دائر کرنے والا پرانے کیس میں ہی اپنے اعتراضات درج کراسکتا ہے۔عدالت نے کہا کہ وہ پرانے کیس کی شنوائی ماہ اپریل کے پہلے ہفتے میں کرے گی۔مذکورہ پٹیشن کی شنوائی رواں پنچایتی انتخابات کے پیش نظر ملتوی کی گئی تھی۔ریاستی و مرکزی سرکاروں نے عدالت سے کہا تھا کہ جموں کشمیر کے حالات ناسازگار ہیں۔عدالت نے کہا کہ وہ نئی پٹیشن کا معاملہ اْس کیس کے ساتھ جوڑے گی جو آئین کی دفعہ پنتیس (اے) کے بارے میں ہے اور جو جموں کشمیر کے عوام کو ”پشتنی باشندے” ہونے کی خصوصیت دیتا ہے اورجس کو متعدد درخواستوں کے ذریعے چیلنج کیا گیا۔قابل ذکر ہے کہ عدالت عظمیٰ نے14نومبر کو کہا تھا کہ وہ ماہ اپریل میں اْس درخواست پر شنوائی کریگی جس میں دفعہ370کو چیلنج کیا گیا ہے۔ یہ تاریخ ریاستی و مرکزی سرکاروں کی عرضداشت کے بعد طے کی گئی تھی۔