خشک موسم اور دن بھر ہلکی دھوپ نکلنے کے بیچ وادی کشمیر میں شبانہ سردیوں کی لہر جاری

سرینگر /03دسمبر /

خشک موسم اور دن بھر ہلکی دھوپ نکلنے کے بیچ وادی کشمیر میں شبانہ سردیوں کی لہر جاری ہے ۔بیشتر مقامات پر رات کا درجہ حرارت منفی میں ہی ریکارڈ کیا گیا ۔اسی دوران محکمہ موسمیات نے موسمی صورتحال میں فی الحال تبدیلی کے امکان کو رد کرتے ہوئے 10دسمبر تک موسم خشک رہے گا ۔ ادھر شدید سردی کی وجہ سے لوگوں کو شدید مشکلات کا سامنا کرنا پڑرہا ہے ۔

سٹار نیوز نیٹ ورک کے مطابق خشک موسمی صورتحال کے چلتے وادی کشمیر اور لداخ میں شدید سردیوں کا زور جاری ہے ۔ بیشتر مقامات پر رات کا درجہ حرارت منفی میں ہی ریکارڈ کیا گیا ۔محکمہ موسمیات کے مطابق گلمرگ اور پہلگام بالترتیب منفی 3.6 ڈگری سیلشس اور منفی 2.4 ڈگری سیلشس کے ساتھ دونوں مقامات سرد ترین رہے۔تاہم سرینگر سمیت کئی مقامات پر پارہ نقطہ انجماد سے اوپر چلا گیا جہاں کم از کم درجہ حرارت 1.4 ڈگری سیلشس ریکارڈ کیا گیا۔کپوارہ میں پارہ 1.2 ڈگری سیلشس رہا جبکہ کوکرناگ میں کم سے کم درجہ حرارت 2.6 ڈگری سیلشس ریکارڈ کیا گیا۔

ادھر محکمہ موسمیات نے 10دسمبر تک موسم زیادہ تر خشک رہنے کی پیشگوئی کی ہے ۔اسی دوران وادی کشمیر میں شدید سردیوں کے نتیجے میں عام لوگوں کے علاوہ بچوں اور ضعیف العمر افراد کو گھروں سے باہر نکلنے میں بھی مشکلات کا سامنا کرنا پڑرہا ہے ۔ چھوٹے بچے اور بزرگ سردی کی شدت کی وجہ سے اپنے ہی گھروں میں مقید ہوکے رہ گئی۔ جبکہ بزرگوں کو سردی کی وجہ سے ہڑیوں اور جوڑوں میں درد میں اضافہ ہوا ہے ۔خیال رہے کہ وادی کشمیر میں چلہ کلان کی آمد سے قبل ہی شدید سردی کے لہر کے باعث اہلیان وادی کو کافی مشکلات کا سامنا ہے جبکہ رات کے دوران درجہ حرارت منفی ریکارڈ ہونے کے باعث لوگ شدید ٹھنڈ کے چلتے بہت سارے پریشانیوں میں مبتلا ہو چکے ہیں ۔