جموں کشمیر میں ترقی کی تیزرفتار اور پیمانہ حیران کن:لیفٹنٹ گورنر کا G20اجلاس سے خطاب

سرینگر میں جاری G20اجلاس سے خطاب کے دوران لیفٹنٹ گورنر منوج سنہا نے کہا کہ جموں کشمیر میں نچلی سطح پر جمہوریت مضبوط ہوئی ہے۔

انہوں نے کہا کہ نئی صنعتیں آ رہی ہیں، تیز زرعی ترقی ہمارے گاؤں کو خوشحال بنا رہی ہے، بنیادی ڈھانچے کی ترقی تیزی سے ہو رہی ہے اور ٹیکنالوجی پر ہمارا زور جموں کشمیر کو ایک ڈیجیٹل معاشرے میں تبدیل کر رہا ہے۔
دنیا دیکھ سکتی ہے کہ پورا معاشرہ بالخصوص نوجوان نسل اپنے اور قوم کے روشن مستقبل کی نوید سن رہی ہے۔ جموں کشمیر میں تیز رفتار ترقی کی رفتار اور پیمانہ حیران کن ہے۔

انہوں نے مزید کہا کہ بنیادی ڈھانچے کے منصوبوں پر عمل درآمد کی ہماری رفتار تقریباً 10 گنا بڑھ گئی ہے۔ گزشتہ مالی سال میں، ہم نے 92,560 منصوبے مکمل کیے ہیں۔ یہ کامیابی امن اور خوشحالی کے ہمارے عزم اور ترقی کے اس سفر میں اپنے تمام شہریوں کو یکساں شراکت دار بنانے کا منہ بولتا ثبوت ہے۔