جموں کشمیر میں ” ایگزٹ پول “ 5اکتوبر کو شام 6بجے کے بعد شائع کئے جائیں گے / الیکشن کمیشن آف انڈیا

سرینگر /30ستمبر/

الیکشن کمیشن آف انڈیا نے اعلان کیا ہے کہ جموں کشمیر میں ” ایگزٹ پول “ 5اکتوبر کو شام 6بجے کے بعد شائع کئے جائیں گے ۔

الیکشن کمیشن آف انڈیا کی طرف سے جاری کردہ ایک پریس نوٹ کے مطابق مورخہ 31 اگست 2024 کے ذریعے جاری کردہ رہنما خطوط کے مطابق اور عوامی نمائندگی ایکٹ، 1951 کی دفعہ 126A کی دفعات کے تحت تمام میڈیا آو¿ٹ لیٹس (پرنٹ، الیکٹرانک یا ڈیجیٹل)، پولنگ ایجنسیوں اور افراد کو مطلع کیا جاتا ہے کہ جموں و کشمیر میں جاری انتخابات سے متعلق ”ایگزٹ پول “کے نتائج کی اشاعت یا نشریات 5 اکتوبر 2024 کو شام 6بجے کے بعد شائع کی جا سکتی ہیں۔یہ پابندی عوامی نمائندگی ایکٹ1951 کی دفعہ 126A کے تحت لازمی ہے۔ اس شق کی خلاف ورزی پر قانونی کارروائی ہو سکتی ہے، جس میں جرمانے اور قید کی سزا بھی شامل ہے جیسا کہ قانون کے مطابق ہے۔

اس پابندی کا اطلاق میڈیا کی تمام اقسام پر ہوتا ہے جس میں اخبارات، ٹیلی ویڑن چینلز، ریڈیو، آن لائن نیوز پورٹلز، سوشل میڈیا پلیٹ فارمز،سروسز جیسے واٹس ائپ،ٹیلی گرام، فیس بک، یوٹیوب، انسٹاگرام شامل ہے ۔ اس کا اطلاق سیاسی جماعتوں، امیدواروں، پولنگ ایجنسیوں پر بھی ہوتا ہے اور کوئی بھی افراد جو الیکشن سے متعلق سرگرمیوں میں مصروف ہوں۔حکمنامہ کے مطابق جموں و کشمیرمیں ضلع الیکشن افسران، ریٹرننگ افسران اور قانون نافذ کرنے والے اداروں کے ساتھ تعمیل کی نگرانی کرے گا۔ کسی بھی خلاف ورزی پر قانون کے مطابق سختی سے نمٹا جائے گا۔
اس اقدام کا مقصد انتخابی عمل کی سالمیت کو برقرار رکھنا اور آزادانہ اور منصفانہ انتخابی ماحول کو یقینی بنانا ہے، اور اس بات کو یقینی بنانا ہے کہ ووٹران اپنے فیصلے قبل از وقت پیشین گوئیوں یا انتخابی نتائج کے تجزیے سے متاثر نہ ہوں۔