جموں و کشمیر میں جزوی سورج گرہن، موسم ماہ رواں کے آخر تک خشک رہنے کا امکان/ محکمہ موسمیات

سرینگر/25 اکتوبر

محکمہ موسمیات کی پیش گوئی کے مطابق جموں وکشمیر میں منگل کے روزخشک موسم کے بیچ جزوی سورج گرہن رہا۔متعلقہ محکمے کے ایک ترجمان نے بتایا کہ جموں وکشمیر میں منگل کے روز جزوی سورج گرہن کا نظارہ دیکھنے کو ملا جبکہ موسم اگلے چوبیس گھنٹوں کے دوران مجموعی طور پر خشک رہے گا۔
انہوں نے کہا کہ سری نگر میں سورج گرہن سہہ پہر 4 بجکر 14 منٹ سے شروع ہوگا جبکہ جموں میں 4 بجکر 17 منٹ سے شروع ہوگا۔ان کہنا تھا کہ غروب آفتاب کے بعد یہ گرہن ختم ہوگا۔موصوف ترجمان نے کہا کہ وادی میں اگلے چوبیس گھنٹوں کے دوران موسم خشک رہنے کا امکان ہے۔انہوں نے کہا کہ وادی میں ماہ رواں کے آخر تک موسم مجموعی طور پر خشک رہنے کی ہی توقع ہے۔
ادھر وادی میں خشک موسم کے بیچ کئی مقامات پر شبانہ درجہ حرارت میں قدرے اضافہ درج ہوا ہے۔سرینگر میں کم سے کم درجہ حرارت 4.8 ڈگری سینٹی گریڈ ریکارڈ کیا گیا جو گذشتہ شب کے درجہ حرارت سے1.1 ڈگری سینٹی گریڈ زیادہ ریکارڈ ہوا تھا۔وادی کے مشہور زمانہ سیاحتی مقام گلمرگ میں کم سے کم درجہ حرارت 1.8ڈگری سینٹی گریڈ ریکارڈ کیا گیا جو گذشتہ شب کے درجہ حرارت سے1.3 ڈگری سینٹی گریڈ زیادہ ریکارڈ ہوا تھا۔وادی کے دوسرے مشہور سیاحتی مقام پہلگام میں کم سے کم درجہ حرارت0.6 ڈگری سینٹی گریڈ ریکارڈ کیا گیا جو گذشتہ شب کے درجہ حرارت سے 0.6 ڈگری سینٹی گریڈ زیادہ ریکارڈ ہوا تھا۔سرحدی ضلع کپوارہ میں کم سے کم درجہ حرارت3.0 ڈگری سینٹی گریڈ ریکارڈ کیا گیا جو گذشتہ شب کے درجہ حرارت سے0.2 ڈگری سینٹی گریڈ کم ریکارڈ ہوا تھا۔
گیٹ وے آف کشمیر کے نام سے مشہور قصبہ قاضی گنڈ میں کم سے کم درجہ حرارت2.4 ڈگری سینٹی گریڈ ریکارڈ کیا گیا جو گذشتہ شب کے درجہ حرارت سے 0.4 ڈگری سینٹی گریڈ کم ریکارڈ ہوا تھا۔دریں اثنا وادی میں منگل کی صبح سے ہی موسم خشک رہا اور موسم خزاں کی نحیف دھوپ بھی چھائی رہی۔