جموں وکشمیر کے ڈاکٹروں کا شمار دنیا کے بہترین ڈاکٹروں میں ہوتا ہے: ڈاکٹرعابد رشید

سری نگر، 11 اپریل

صحت اور طبی تعلیم کے سکریٹری ڈاکٹر سید عابد رشید کا کہنا ہے کہ جموں وکشمیر کے ڈاکٹروں کا شمار دنیا کے بہترین ڈاکٹروں میں ہوتا ہے۔

انہوں نے ان باتوں کا اظہار جمعہ کے روز سری نگر میں منعقدہ 52ویں انڈین ایسوسی ایشن آف پریونٹیو اینڈ سوشل میڈیسن (آئی اے پی ایس ایم) کانفرنس کے موقع پر میڈیا سے بات چیت کرنے کے دوران کیا۔

انہوں نے امید ظاہر کی کہ اس تاریخی تقریب کے نتائج قومی صحت کی پالیسی کو تشکیل دینے اور ملک میں احتیاطی سماجی ادویات کو مضبوط بنانے کے لئے مدد گار ثابت ہوں گے۔

ان کا کہنا تھا کہ گورنمنٹ میڈیکل کالج سری نگر کے زیر اہتمام اس کانفرنس میں ہندوستان بھر سے اعلیٰ طبی میدان کے بہترین ذہنوں، پالیسی سازوں اور صحت کے پیشہ ور افراد کو اکٹھا کیا گیا ہے۔

موصوف سکریٹری نے کہا کہ فزیکل اور ورچوئل دونوں طریقوں سے ایونٹ میں 550 سے زیادہ تحقیقی مقالے پیش کیے گئے ہیں۔
انہوں نے کہا: ‘یہ ملک کے طبی میدان کے بہترین دماغوں کا اکیڈمک اجتماع ہے۔ ہمارے پاس ہر ریاست اور مرکز کے زیر انتظام علاقے سے شرکاء موجود ہیں’۔
انہوں نے جموں و کشمیر میں ایسی قومی کانفرنسوں کی میزبانی کی اہمیت پر زور دیتے ہوئے کہا: ‘سری نگر میں سیاحوں کی تعداد میں بھی اضافہ دیکھا جا رہا ہے اور اس نوعیت کی کانفرنسز اس تناظر میں بھی مثبت نتاج کا باعث بن سکتی ہیں۔
یو این آئی ایم افض