جموں میں بندوق کی نوک پر معروف تاجر کے گھر کو لوٹ لیا گیا، اہل خانہ کو پانچ گھنٹے تک یرغمال بنایا

سرینگر/7 دسمبر

جموں وکشمیر کی سرمائی راجدھانی جموں کے پوش علاقے گاندھی نگر میں دس نامعلوم بندوق برداروں نے فلمی انداز میں ایک معروف تاجر کے گھر میں گھس کر بندوق کی نوک پر اہل خانہ کو یرغمال بنایا۔معلوم ہوا ہے کہ نامعلوم بندوق بردار 15لاکھ روپیہ لوٹ کر گھر سے فرار ہوئے۔ایس ایس پی جموں چندن کوہلی کے مطابق چوری کی اس واردات میں ملوث افراد کو بہت جلد بے نقاب کیا جائے گا۔اطلاعات کے مطابق جموں کے پوش علاقے گاندھی نگر میں بدھوار صبح چھ بجکر 55 منٹ پر نامعلوم بندوق بردار جن کی تعداد دس بتائی جارہی ہے معروف تاجر راکیش اگروال کے گھر میں گھس گئے اور وہاں پر موجود اہل خانہ کو یرغمال بنایا۔ذرائع نے بتایا کہ معروف تاجر راکیش اگروال صبح 6 بجکر 55 منٹ پر گھر سے باہر آئے تو اسی اثنا میں آس پاس موجود دس نامعلوم نقاب پوش بندوق بردار گھر میں گھس آئے اوروہاں اہل خانہ کو ایک کمرے میں جمع کرکے ا±ن سے 15کروڑ روپیےکی رقم طلب کی۔انہوں نے کہا کہ مسلسل ساڑھے پانچ گھنٹے تک یرغمال بنائے جانے والے گھر والوں سے بات چیت کے بعد نامعلوم بندوق برداروں نے اس گھر سے 15لاکھ روپیہ کی رقم لوٹ لی اور وہاں سے فرار ہونے میں کامیاب ہوئے۔اہل خانہ کے مطابق چوروں کے پاس دیسی ساخت کے ہتھیار تھے اور وہ 15کروڑ روپیہ کا تقاضہ کر رہے تھے تاہم مسلسل پانچ گھنٹے تک بات چیت کے بعد دن کے ساڑھے بارہ بجے وہ 15لاکھ روپیہ پر لینے پر راضی ہوئے۔چوری کی اس واردات کے بعد گاندھی نگر جموں میں سراسیمگی پھیل گئی ہے۔دریں اثنا ایس ایس پی جموں چندن کوہلی نے بتایا کہ چوری کے اس معاملے کو بہت جلد حل کیا جائے گا کیونکہ پولیس کے ہاتھ اہم ثبوت لگے ہیں