بین ریاستی منشیات سمگلنگ کے ماڈیول کا پردہ فاش، دلی اور اتر پردیش سے دو منشیات فروش گرفتار: سرینگر پولیس

سری نگر، 28 جنوری

سری نگر پولیس نے ایک بین ریاستی منشیات سمگلنگ کے ماڈیول کا پردہ فاش کرکے دلی اور اتر پردیش سے 2 منشیات فروشوں کو گرفتار کیا ہے۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ سری نگر پولیس نے سیکشن 8/22-29 این ڈی پی ایس ایکٹ کے تحت درج ایف آئی آر نمبر 136/2024 کے ایک کیس کی تحقیقات کرتے ہوئے بین ریاستی منشیات کی اسمگلنگ کے ایک بڑے نیٹ ورک کا پر دہ فاش کر دیا ہے۔
انہوں نے کہا: ‘بینک ٹرانزیکشنز اور کمیونیکیشن ریکارڈ سمیت تفتیش کے شواہد کی بنیاد پر بریلی اتر پردیش سے راجو گپتا اور بھجن پورہ دہلی سے محمد ابرار نامی دو اہم منشیات فروشوں کی شناخت مقامی منشیات فروشوں کو منشیات سپلائی کرنے کے بڑے ذرائع کے طور پر کی گئی’۔
بیان میں کہا گیا کہ پولیس پوسٹ نورباغ کے ایس آئی امن دیپ سنگھ کی قیادت میں سری نگر پولیس کی ایک ٹیم نے مقامی پولیس کی مدد سے 10 دنوں کے دوران اتر پردیش اور دہلی میں وسیع پیمانے پر آپریشن کیا۔
موصوف ترجمان نے کہا کہ راجیو گپتا کو 23 جنوری 2025 کو بریلی میں جبکہ محمد ابرار کو 24 جنوری 2025 کو بھجن پور میں گرفتار کیا گیا۔
انہوں نے کہا کہ دونوں ملزموں کو متعلقہ عدالتوں میں پیش کیا گیا اور ٹرانزٹ ریمانڈ حاصل کرنے کے بعد دونوں اس وقت پولیس کی تحویل میں ہیں۔
بیان کے مطابق غازی آباد کے لونی میں ملزم سے منسلک ایک مشتبہ کورئیر پارسل کی شناخت کی گئی ہے اور عدالت کی منظوری سے اسے بازیافت کرنے کے لیے اقدامات کیے جا رہے ہیں۔
انہوں نے کہا کہ این ڈی پی ایس ایکٹ کے تحت ممکنہ اٹیچمنٹ کے لیے ملزم کے مالی لین دین اور جائیدادوں کی جانچ کی جا رہی ہے۔
پولیس ترجمان نے بتایا کہ یہ معاملہ 8 نومبر 2024 کو تربل چوک، سری نگر میں معمول کی پولیس ناکہ چیکنگ کے دوران شروع ہوا جب ایک موٹر سائیکل کو روکا گیا جس کے نتیجے میں اعزاز احمد گنائی (اتھواجن پانتھہ چوک)، اویس احمد گوجری (براڑی پورہ) اور میر رومان (علی مسجد عیدگاہ) نامی 3 منشیات فروشوں کو گرفتار کرلیا گیا تھا۔
انہوں نے کہا کہ پولیس نے کوڈین فاسفیٹ کی 140 بوتلیں، 38 ہزار 5 سو 30 روپیے منشیات کی مشتبہ رقم، 3 موبائل فون اور ایک ڈرون کیمرہ ضبط کیا جو مبینہ طور پر منشیات کے خریداروں کی نگرانی کے لیے استعمال کیا جاتا تھا۔
ان کا کہنا تھا کہ اس معاملے کی تفتیش کے دوران سامنے آنے والے گذشتہ روابط نے پولیس کو دہلی اوراتر پردیش کے مذکورہ 2 منشیات فروشوں تک پہنچایا۔
انہوں نے کہا کہ اس ضمن میں مزید تحقیقات جاری ہیں اور آنے والے دنوں میں مزید گرفتاریاں اور ضبطیاں متوقع ہیں۔
بیان میں کہا گیا کہ سری نگر پولیس منشیات کے نیٹ ورک کو ختم کرنے اور معاشرے کی حفاظت کو یقینی بنانے کے لیے پرعزم ہے۔