بڈگام میں نقب زن گرفتار، چرائی گئی گاڑی اور لاکھوں روپیہ مالیت کا مالہ مسروقہ ضبط :پولیس

سرینگر/14 جنوری

بڈگام پولیس نے نقب زنی میں ملوث سارق کی گرفتاری عمل میں لا کر اس کے قبضے سے چرائی گئی گاڑی اور لاکھوں روپیہ مالیت کا سامان برآمد کرکے ضبط کیا۔ پولیس کے ایک ترجمان نے بتایا کہ 12جنوری 2024کو پولیس اسٹیشن ماگام میں دکانداروں نے تحریری طورپر شکایت درج کی کہ درمیانی شب نامعلوم افراد نے دکانوں میں نقب لگا کر وہاں سے لاکھوں روپیہ مالیت کی اشیائ کے ساتھ ساتھ ایک ٹاٹا سومو بھی چرا کر راہ فرار اختیار کی۔

شکایت موصول ہوتے ہی پولیس نے معاملے کی نسبت ایف آئی آر زیر نمبر 3/2024کے تحت کیس درج کرکے تحقیقات شروع کی۔موصوف ترجمان کے مطابق تفتیش کے دوران چند مشتبہ افراد کی گرفتاری عمل میں لا کر ان سے پوچھ تاچھ شروع کی گئی جس دوران ملزم حمایت حسین میر ولد محمد حسین میر ساکن یگی پورہ ماگام کو بھی دھر دبوچا گیا۔انہوں نے بتایا کہ سی سی ٹی فوٹیج کو کھنگالنے کے بعد پتہ چلا کہ چرائی گئی ٹاٹا سومو گاڑی کو پٹن سوپور کی طرف لے جایا گیا ہے چنانچہ فوری طورپر پولیس ٹیم تشکیل دی گئی جنہوں نے ہائیگام سوپور کے نزدیک سومو اور لاکھوں روپیہ مالیت کا مالہ مسروقہ برآمد کیا۔

انہوں نے مزید بتایا کہ معاملے کی تحقیقات جاری ہے اور مزید گرفتاریوں کو خارج از امکان قرار نہیں دیاجاسکتا۔بڈگام پولیس نے دکانداروں سے اپیل کی ہے کہ وہ ضلعی مجسٹریٹ کے حکم پر عمل کرتے ہوئے سی سی ٹی وی کیمرے نصب کریں۔یو این آئی