بفلیاز واقعہ: تھنہ منڈی بفلیاز کے جنگلی علاقے میں چھٹے روز بھی آپریشن جاری، خصوصی کمانڈوز کو تعینات کیا گیا

جموں،26دسمبر

ضلع راجوری کے تھنہ منڈی بفلیاز کے جنگلی علاقے میں منگل کومسلسل چھٹے روز وسیع پیمانے پر تلاشی آپریشن جاری رہا۔ذرائع نے بتایا کہ ملی ٹینٹوں کو کیفر کردار تک پہنچانے کی خاطر خصوصی کمانڈوز کو بھی جنگلی علاقے کی اور روانہ کیا گیاہے۔معلوم ہواہے کہ سیکورٹی فورسز نے بفلیاز سے لے کر ڈھیرہ گلی ٹاپ تک کے ایک وسیع علاقے کو سیل کیا ہے۔پونچھ اور راجوری اضلاع میں چوتھے روز بھی موبائیل انٹرنیٹ خدمات بدستور معطل ہے۔

بتادیں کہ بفلیاز تھنہ منڈی میں جمعرات کی سہ پہر ملی ٹینٹوں نے فوجی گاڑیوں پر گھات لگا کر حملہ کیا جس کے نتیجے میں چار فوجی از جان جبکہ دو دیگر زخمی ہوئے تھے۔اطلاعات کے مطابق بفلیاز پونچھ میں مسلسل چھٹے روزبھی مفرور ملی ٹینٹوں کو ڈھونڈ نکالنے کی خاطر تلاشی آپریشن جاری رہا۔ذرائع نے بتایا کہ سیکورٹی فورسز نے بیک وقت 15مقامات پر سرچ آپریشن لانچ کیا ہے جبکہ مقامی لوگوں کو مطلع کیا گیا کہ وہ فی الحال جنگلی علاقوں کی اور جانے سے گریز کریں۔انہوں نے کہا کہ وہاں چھپے دہشت گردوں کا سراغ لگانے کے لئے فضائی نگرانی کی جا رہی ہے اور سراغ رساں کتوں کو بھی کام پر لگایا گیا ہے۔

ذرائع نے بتایا کہ جموں وکشمیر پولیس اور فوج کے سینئر آفیسران آپریشن کی از خود نگرانی کر رہے ہیں۔دفاعی ذرائع نے بتایا کہ بفلیازپونچھ میں تلاشی آپریشن کا دائرہ مزید کئی جنگلی علاقوں تک وسیع کیا گیا ہے۔انہوں نے بتایا: دہشت گردجنگلی علاقے میں بھی ہی موجود ہو سکتے ہیں جس کے پیش نظر فوج کی اضافی کمک کو طلب کیا گیا تاکہ حملہ آوروں کو کیفر کردار تک پہنچایا جاسکے’۔دفاعی ذرائع نے مزید بتایا کہ لوگوں سے تلقین کی گئی ہے کہ وہ فی الحال جنگلی علاقوں کی اور جانے سے گریز کیا کریں کیونکہ وہاں پر سیکورٹی فورسز نے جگہ جگہ پر ناکے لگائے ہیں۔ذرائع نے بتایا کہ بفلیاز راجوری شاہراہ کو ٹریفک کی آمدورفت کے لئے بند رکھا گیاہے۔ادھر اس حملے کے بعد پونچھ اور راجوری اضلاع میں سیکورٹی کے کڑے انتظامات کئے گئے ہیں۔

اطلاعات کے مطابق ضلع کی بعض سڑکوں پر ناکے لگا دئے گئے ہیں جہاں لوگوں کی جامہ تلاشی کے علاوہ کارڈ چیکنگ کی جاتی ہے اور ان کے موبائل بھی چیک کئے جاتے ہیں۔انہوں نے کہا کہ ان ناکوں پر گاڑیوں کی بھی تلاشی کی جاتی ہے۔ان کا کہنا تھا کہ تاریخی مغل روڈ پر بھی کئی ناکے لگا دئے گئے ہیں جہاں آنے جانی والی گاڑیوں کی تلاشی کی جاتی ہے۔بعض ذرائع کے مطابق حکام نے راجوری اور پونچھ میں احتیاطی طورپر موبائیل انٹرنیٹ خدمات کو معطل رکھا ہے۔ذرائع نے بتایا کہ امن و قانون کی صورتحال کو برقرار رکھنے اور افواہوں سے بچنے کی خاطر موبائیل انٹرنیٹ کو بند رکھا گیا ہے۔بتادیں کہ فوجی سربراہ منوج پانڈے نے پیر کے روز پونچھ کا دورہ کیا اور وہاں پر سینئر آفیسران کے ساتھ پونچھ اور راجوری کی تازہ ترین صورتحال پر تبادلہ خیال کیا۔ذرائع نے بتایا کہ فوجی سربراہ نے آفیسران کو ہدایت دی کہ پونچھ اور راجوری کے سرحدی علاقوں میں مزید چوکسی بڑھانے کے ساتھ ساتھ اضافی اہلکاروں کو بھی تعینات کیا جائے تاکہ ملک دشمن عناصر کے منصوبوں کو ناکام بنایا جاسکے۔یو این آئی