بارہمولہ میں منشیات فروش کی غیر منقولہ جائیداد قرق:پولیس

سرینگر، 30 مارچ

منشیات فروشوں کے خلاف مہم کو جاری رکھتے ہوئے پولیس نے شمالی کشمیر کے ضلع بارہمولہ کے قصبہ اوڑی میں ایک بد نام زمانہ منشیات فروش کی لاکھوں روپیے مالیت کی غیر منقولہ جائیداد کو قرق کر دیا۔

مذکورہ منشیات فروش کی شناخت آزاد احمد میر ولد عبدالعزیز میر ساکن درد کوٹ اوڑی کے طور کی گئی ہے۔ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ بارہمولہ پولیس نے آزاد احمد میر ولد عبدالعزیز میر ساکن درد کوٹ اوڑی نامی ایک بدنام زمانہ منشیات فروش کی غیر منقولہ جائیداد قریب 30 لاکھ روپیے مالیت کا دو منزلہ رہائشی مکان قرق کر دیا۔

انہوں نے کہا کہ یہ کارروائی این ڈی پی ایس ایکٹ 1985 کے متعلقہ دفعات کے تحت انجام دی گئی اور اس سلسلے میں پولیس اسٹیشن اوڑی میں ایک ایف آئی آر زیر نمبر222/2021 درج ہے۔بیان میں کہا گیا کہ کولگام پولیس کی طرف سے تحقیقات کے دوران اس جائیداد کی شناخت غیر قانونی طور حاصل شدہ جائیداد کے طور پر ہوئی ہے۔ان کا کہنا تھا: ‘یہ جائیداد پہلی نظر میں منشیات فروش کی طرف سے نشہ آور اور ادویات اور سائیکو ٹراپک مواد کی غیر قانونی اسمگلنگ سے حاصل کی گئی تھی۔