سرینگر، 09 اپریل
جموں وکشمیر پولیس نے شمالی کشمیر کے ضلع بارہمولہ میں الگ الگ کارروائیوں کے دوران دو منشیات فروشوں کو گرفتار کرکے نقدی رقم اور براﺅن شوگر جیسا نشہ آور مواد بر آمد کیا ہے۔
ایک پولیس ترجمان نے تفصیلات فراہم کرتے ہوئے کہا کہ بشیر احمد گنائی ولد ولی محمد گنائی ساکن تری کنجن بونیار کے گھر میں نشہ آور مواد کی موجودگی کے بارے میں اطلاع موصول ہونے پر بارہمولہ پولیس نے ایگزیکٹیو مجسٹریٹ کے ساتھ مذکورہ شخص کے گھر پر چھاپہ مارا۔انہوں نے کہا کہ تلاشی کے دوران ایگزیکٹیو مجسٹریٹ کی موجودگی میں 2 لاکھ 36 ہزار روپیے نقدی، 10 گرام براﺅن شوگر جیسا نشہ آور مواد اور جنگلی جھڑی بوٹیاں بر آمد کی گئیں۔بیان میں کہا گیا کہ منشیات فروش کو حراست میں لیا گیا اور اس سلسلے میں پولیس اسٹیشن بونیار میں ایک کیس درج کرکے تحقیقات شروع کی گئیں۔
پولیس ترجمان نے کہا کہ ایک اور کارروائی کے دوران پولیس نے ماگرے پورہ ووسن میں ناکہ چیکنگ کے دوران ایک اور منشیات فروش کو گرفتار کیا۔انہوں نے کہا کہ ذوالقرنین میر والد عبد الاحد میر ساکن شومناگ کپوارہ نامی ایک منشیات فروش نائید کھائی سے ہامرے کی طرف آرہا تھا اس دوران اس نے ناکہ دیکھ کر فرار ہونے کی کوشش کی تاہم اس کو دھر لیا گیا۔
بیان میں کہا گیا کہ منشیات فروش کی تحویل سے 15 گرام براﺅن شوگر جیسا نشہ آور مواد بر آمد کیا گیا۔انہوں نے کہا کہ پولیس نے اس سلسلے میں پولیس اسٹیشن پٹن میں ایک کیس درج کرکے مزید تحقیقات شروع کی ہیں۔دریں اثنا پولیس نے عوام النا س سے اپیل کی ہے کہ وہ منشیات کا کاروبار کرنے والوں کے بارے میں قانون نافذ کرنے والے ادارے کو مطلع کرے کیونکہ منشیات فروشی سماج کے لئے ناسور بن چکی ہے جس کا قلع قمع کرنے کی خاطر ہر ایک کو قانون نافذ کرنے والے ادارے کے ساتھ اپنا بھر پور تعاون فراہم کرنا چاہئے۔ یو این آئی
Comments are closed.