سرینگر، 31 مارچ
منشیات کی لعنت کی بیخ کو یقینی بنانے کے لئے جنگ کو جاری رکھتے ہوئے جموں وکشمیر پولیس نے الگ الگ کارروائیوں کے دوران شمالی کشمیر کے ضلع بارہمولہ میں تین منشیات فروشوں کو گرفتار کرکے ان کی تحویل سے ممنوعہ مواد بر آمد کیا ہے۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس نے خان پورہ بارہمولہ میں ایک ناکے پر دو افراد کو روکا۔انہوں نے کہا کہ تلاشی کے دوران ان کی تحویل سے 140 گرام چرس جیسا ممنوعہ مواد بر آمد کیا گیا جس کے بعد دونوں کو گرفتار کرکے پولیس اسٹیشن بارہمولہ میں بند رکھا گیا۔بیان میں گرفتار شدگان کی شناخت آزاد احمد بٹ ساکن نائد کھائی اور عاقب احمد گوجری ساکن باغ اسلام کے طور پر کی گئی ہے۔اسی طرح کی ایک اور کارروائی کے دوران بونیار پولیس کی ایک پارٹی نے بمیار بونیار میں ایک ناکے کے دوران موٹر سائیکل پر سوار ایک شخص کو روکا۔
پولیس ترجمان نے کہا کہ تلاشی کے دوران اس کی تحویل سے 40 گرام چرس جیسا نشہ آور مواد بر آمد کیا گیا جس کے بعد اس کو گرفتار کیا گیا اور موٹر سائیکل کو ضبط کیا گیا۔انہوں نے گرفتار شدہ منشیا ت فروش کی شناخت مدثر رشید وانی ساکن گانٹمولہ کے طور پر ہوئی ہے۔پولیس نے اس سلسلے میں پولیس اسٹیشن بارہمولہ اور بونیار میں متعلقہ دفعات کے تحت مقدمے کے درج کرکے مزید تحقیقات شروع کی ہے۔
قابل ذکر ہے کہ بارہمولہ پولیس نے ضلع میں سال رواں کے پہلے دو مہینوں کے دوران منشیات فروشوں کے خلاف این ڈی پی ایس ایکٹ کے تحت 39 مقدمے درج کرکے 62 منشیات فروشوں کی گرفتاری عمل میں لا کر ان کی زائد از ایک کروڑ روپے مالیت کی جائیدادوں کو ضبط کیا ہے۔
Comments are closed.