ایشیا کپ؛ بارش کے باعث پاک بھارت میچ بے نتیجہ ختم

ایشیا کپ میں بارش کے باعث پاک بھارت میچ بے نتیجہ ختم کردیا گیا۔

سری لنکا کے شہر کینڈی کے پالی کیلے اسٹیڈیم میں ایشیا کپ کے تیسرے میچ میں بھارت نے پاکستان کو جیت کیلئے 267 رنز کا ہدف تھا تاہم بارش کے باعث میچ تاخیر کا شکار ہوگیا اور پاکستان اپنی اننگز شروع نہیں کرسکا جس پر دونوں ٹیموں کو ایک ایک پوائنٹ دیکر میچ ڈرا کردیا گیا۔

قبل ازیں بھارتی کرکٹ ٹیم کے کپتان روہت شرما نے ٹاس جیت کر پہلے بیٹنگ کا فیصلہ کیا تھا، پاکستانی پیسرز نے شاندار بالنگ کرتے ہوئے بھارت کا ٹاپ آرڈر اڑا کر رکھ دیا۔ بھارت کی ٹیم 50 اوورز بھی پورے نہ کھیل سکی اور 48.5 اوورز میں 266 رنز بناکر ڈھیر ہوگئی۔
میچ کے آغاز میں پاکستانی بولرز بھارتی بلے بازوں پر حاوی رہے۔ بھارت کی پہلی وکٹ 15 رنز پر گری جب کہ 66 رنز کے مجموعی اسکور تک بھارت کے چار کھلاڑی آؤٹ ہوچکے تھے۔

بھارتی اوپنر روہت شرما 11، ویرات کوہلی 4، شیرس ایر 14 اور شبمن گِل 10 رنز بناکر آؤٹ ہوئے تاہم بعد میں آنے والے ایشان اور ہارڈیک پانڈیا کریز پر جم گئے اور اسکور کو کافی آگے لے گئے۔