امرناتھ یاترا: بھگوتی نگر بیس کیمپ سے قریب ساڑھے چار ہزار یاتریوں کا قافلہ کشمیر روانہ

سری نگر، 12 جولائی

امر ناتھ یاترا کا سلسلہ جوش و خروش سے جاری رہتے ہوئے جموں کے بھگوتی نگر بیس کیمپ سے جمعہ کی صبح سخت سیکورٹی بند وبست کے بیچ قریب ساڑھے چار ہزار یاتریوں کا پندرہواں قافلہ کشمیر کے لئے روانہ ہوا۔

سرکاری ذرائع نے بتایا کہ بھگوتی بیس کیمپ سے جمعہ کی صبح سخت سیکورٹی حصار میں 4 ہزار 4 سو 34 یاتری 165 چھوٹی بڑی گاڑیوں میں جنوبی کشمیر کے ضلع اننت ناگ میں واقع ننون پہلگام اور وسطی کشمیر کے ضلع گاندر بل میں واقع بالتل بیس کیمپوں کی طرف روانہ ہوئے۔انہوں نے کہا کہ ان یاتریوں میں سے 2 ہزار 7 سو 13 یاتری پہلگام بیس کیمپ جبکہ 1 ہزار 7 سو 21 یاتری بالتل بیس کیمپ کے لئے روانہ ہوئے۔ان کا کہنا ہے کہ اس تازہ قافلے کی روانگی کے ساتھ بھگوتی نگر بیس کیمپ سے اب تک 81 ہزار 6 سو 44 یاتری پوتر گھپا کے درشن کے لئے کشمیر روانہ ہوئے۔

یاد رہے کہ جموں وکشمیر کے لیفٹیننٹ گورنر منوج سنہا نے 28 جون کی صبح 4 ہزار 6 سو 3 یاتریوں کے پہلے جتھے کو جموں کے بھگوتی نگر بیس کیمپ سے کشمیر کے لئے روانہ کیا تھا۔وادی میں انتظامیہ، سول سوسائٹی تنظمیوں، تجارتی یونیوں اور عام لوگوں نے یاتریوں کا پرتپاک استقبال کیا۔
یاترا کو تحفظ کو یقینی بنانے کے لئے تمام تر انتطامات کئے گئے ہیں۔جہاں یاتریوں کو تمام سہولیات و خدمات بہم پہنچانے کے لئے بہترین انتظامات کئے گئے ہیں وہیں سیکورٹی کا بھی فقید المثال بند وبست کیا گیا ہے۔پولیس ذرائع کے مطابق یاترا روٹوں پر قریب 800 سی سی ٹی وی کیمرے نصب کئے گئے ہیں۔علاوہ ازیں سیکورٹی فورسز کی 500 اضافی کمپنیاں تعینات کی گئیں ہیں۔ ہر کمپنی کم از کم ایک سو اہلکاروں پر مشتمل ہے۔52 دنوں پر محیط یہ یاترا 19 اگست کو رکشا بندھن کے موقع پر اختتام پذیر ہوگی۔